ꆀꃅꈎꏅꉂ
ꁱ:ꐙꇖꍮꇜ
ꀘ:ꁭꇐꇅꂮ
ꆿꆪꏭꁧꏂ
ꌩꏾꇓꏾꏋꄹꊰ
ꆃꎭꃅꄷꏭ
ꆈꌠꌺꇖꈎꏅꆪꆗꇁꂯꄉ
ꉷꃅꇓꈐꆹ
ꎰꆳꈺꄂꀕꃅꁏꇁꉠꇬꌸ
ꉌꃀꍇꌠꀊꅰꈺꄂꀕꃅꁏꇀꌦ
ꑳꉎꌕꁄꏭ
ꁦꌋꇈꌋꑋꅉꑌ
ꑳꐮꌕꁄꏭ
ꒈꌋꃪꌋꉆꅉꉆ
ꐷꈭꐷꇜꏭ
ꆺꑳꀉꄉꌩꏓꌩꈉꃪꅪꎆ
ꆺꑳꀉꂿꃮꉘꃮꀠꀆꆽꀕ
ꇤꉎꌕꁄꏭ
ꁍꁇꒌꆠꑋꅉꑌ
ꐰꇑꈐꉘꉆꅉꉆ
ꑍꇀꌕꑍꄮꇬꆏ
ꈝꃀꈛꌺꉐꑋꊏ
ꄩꆏꈭꇁꃹꈴꏿꏭꐛ
ꀏꆏꅫꇁꌱꈴꏽꏭꐛ
ꈎꏅꌕꑍꆏ
ꆺꑳꏂꃴꏭ
ꋚꑌꉘꁇꁉꏭꐛ
ꎧꏸꐝꇅꀕꏭꐛ
ꄁꃰꏿꌠꉠꑠꀕꍇꑌ
ꉁꆹꆀꃅꉂ
ꆀꃅꉂꄮꉂꀋꉆ
ꎆꎹꋚꈹꆀꇀꉷꃅꏹ
ꉁꆹꀊꂿꉂ
ꎆꎹꎆꀋꐛꂿꄷ
ꆺꑳꀉꂿꀕꄮꂿꀋꄐ
ꉁꆹꈎꏅꉂ
ꇇꇐꇇꀋꂨꐛꆎ
ꀁꇬꈎꏅꇁꀋꄐꀐꂼ